لفرق بين الأوربيين والخناشلة كي يروح التريسيتي...
كي يروح في ألمانيا... يتخطف الرجل ويقول للزوجة تاعو لابد أنه مشكل كبير جدا لان الكهرباء لم تنقطع منذ مدة
كي يروح في إنجلترا يقول لمرتو يبدو ان هناك تفجير كبير لأن من المستحيل أن ينقطع التيار إلا بفعل إرهابي وبعد 15 دقيقة يرجع التيار الكهربائي...
في فرنسا كي يروح التريسيتي الأب: إحذروا السقوط... الأم أشعلوا هواتفكم جاك تفقد المولد الكهربائي وقم بإشعاله... لا تخافو سيعود في الحال
في خنشلة كي يروح التريسيتي...
يروح 12 مرة فالنهار... تاع سونلغاز يتقابض مع مرتو يكوبيه يتقابض مع روحو يكوبيه ما يفطرش يكوبيه... وإذا كان المرال تاعو مليح تجي نسمة خفيفة دير ماس يروح... ولا يتحط فرخ يدير ماس في زوي يروح على قايس...
وساعات التريسيتي راح صايي يتقابض مع مرتو يهبط يكوبيه يلقاه ماكانش يولي يرجعو 5 ثواني ويعاود يكوبيه معناه أنساو روحو ترقدو
العمال تاع سونلغاز ياهوا كرفي ثاني... خلي نكمل القهوة تاعي ونهبط... يروح يعاود يرجع لازم الجماعة تاع التيكنيك كامل يروحو باش يرجع...
فالمنزل: غير يرمش برك يقول لمرطو وجدي الشمع بيان فيه راح يديرها الليلة... وغير يروح التريسيتي ينطق الأب نوض شوف تراه راح على الناس كامل ولا غير حنا تقول سونلغاز شارينهالو ليه هو...
الام هاتو تراه الخلا تاع التلفون نروح كانش ما نلقى الشمع تاع عيد المولد تاع 1996... دور تقلب الدار بسيف تلقى طرف شمعة تقول لراجلها ديما نقلك جيب الشمع... يقلها فعيد المولد فكريني...
الضو يروح يتكلم فيك صباط للوجه ويقولولك شش قلنا شكون ضربك... الأب يدعي الله لا تربحهم ما لقاو وقتاش يريحوه غير وقت الماتش وهو قاعد يتفرج فالخريطيات كونتر السيلية ولا فالعنابي القطري كونطر الأخضر السعودي...
الإبن يجبد التلفون... أسمحيلي حنونتي راح التريسيتي غدوة نحكيو فالفايسبوك إذا رجع على خاطر على بالو بلي أنسى يرجع هاذيك الليلة...
الفتاة طيب الرخسيس فالظلمة وتنزل عليها الرومنسية تحت أظواء الشمع وتغني إييييي بلارة والدار كامل دايرين على الطاجين...
المهم يلمو خمسة ولا ستة أطراف تاع شمع تلمهم ما يديروش شمعة قد قد... ويا مخلوق ربي هاذوك الطراف يحكوا أكثر بتية تاع غاز... يغسلوا عندهم الماعن ويطيبوا العشاء ويتزيدو يتعشاوا ويكملوا يسهروا عندهم... يلعبوا المحاجيات ويقلهم الأب بكل حنان... هيا طفي عليا الشمعات هاذو وكل واحد يحكم بلاصتو غدوة تنوضو بكري... ويرقدوا في سعادة...
موضوع: لفرق بين الأوربيين والخناشلة كي يروح التريسيتي... 
الأحد 7 ديسمبر 2014 - 22:20
